7 октября день памяти Святых мучеников Маркиана и Мартирия, Преподобного Мартирия Печерского, затворника, Святой праведной Тавифы

Кондак мучеников Маркиана и Мартирия глас 4

Подвигшеся добре от младенства,/ Маркиане с мудрым Мартирием,/ отступника Ария низложисте,/ невредно сохраньше Православную веру,/ Павлу последующе, мудрому учителю,/ темже с ним обретосте живот,// яко Троицы поборницы изряднейшии.

Тропарь преподобного Мартирия, диакона Печерского, в Дальних пещерах глас 1

Служивый в чину диаконства Господеви добре,/ честный иеродиаконе Мартирие,/ и тамо яко слуга Господень обретыйся,/ идеже и Господь твой,/ молися Ему и о нас,/ да подаст нам велию милость.

Кондак преподобного Мартирия, диакона Печерского, в Дальних пещерах глас 2

Диаконе честный, иночествующим похвало/ и преподобным сопричастниче всеблаженне Мартирие,/ молися Господеви непрестанно о всех нас.

Тропарь праведной Тавифы глас 4

Днесь вера Христова утверждается камнем веры,/ и ликовствует в веселии Иоппия,/ псаломски славословят Жизнодавца Сына Божия вернии,/ видяще совершаемо велие чудо:/ первоверховный апостол глаголет,/ и умершая востает от гроба,/ юже Низложитель смерти дарует Церкви,/ да украшаются во образ ея добродетельми люди./ Приидите убо, христиане,/ принесем ко святей моления наша:/ блаженная Тавифо и милосердная,/ вознеси наша воздыхания Пресвятей Троице/ и молися со дерзновением,/ да сынове Света Превечнаго будем,/ да сподобимся Божия милости,/ да пребываем в любви Божественней,/ и да царствует мир во вселенней.

Кондак праведной Тавифы глас 4

Ужасахуся Иоппийстии людие, и дивляхуся Ангели Божии,/ егда исцеливый Еннея воззва от мертвых серну нарицаемую, милосердием преукрашенную,/ о нейже к нему взываху вдовицы неимущыя./ И ныне, Тавифо блаженная, услыши молитвы наша, к тебе приносимыя,/ и испроси у всяческих благ Подателя милости и щедроты верным Его,/ да, блажаще тя, вопием ти:/ радуйся, добродетели нас научающая.

Молитва
О блаженна еси, святая Тавифо, возросшая в винограднице Христове, он же и есть Церковь Божия. От лозы истинныя Иисуса Сладчайшаго почерпла еси божественныя токи благодати, ими же уплодоносилася от земли к Небесным. Яко грозд винный, напитай нас и увесели подражанием тебе в добрых делах, да сподобимся неизреченных благ. Проповедаше сице Господь: «яко аще зерно пшеничное, павше в землю, не умрет – едино пребывает, аще же умрет – сотворит плод изобильный». Успение твое, Тавифо, явися плодоносно не токмо твоея добродетели ради – сия же ныне во услышание Церкви всей явися яко образ достоподражательный многим – наипаче сие сотворися во утверждение веры Христовы, отверзающей человеком райския двери: да сочетаваются Небесная с земными. Мы же, в добродетелех оскудевши, молитв твоих ко Всещедрому просим: да спасет и помилует души наша, мирови же подаст мир и велию милость. Днесь собори верных ликовствуют, прославляюще величие добродетели, еже яви Господь в житии Святей своей ученицы, кая процвела яко финикс, приумноживши таланты Господни. Испроси, о Тавифо, ублажающим тя оставление прегрешений. Аминь.