СВЯТОЙ РАВНОАПОСТОЛЬНЫЙ АВЕРКИЙ, ЕПИСКОП ИЕРАПОЛЬСКИЙ

Cвятой равноапостольный Аверкий, епископ Иерапольский, чудотворец, прославился во II веке во Фригии. Город Иераполь в те времена населяли, в основном, язычники. Святитель молился Господу о спасении их душ и обращении к Истинному Свету. Явившийся Ангел повелел святому Аверкию сокрушить идолов в языческом капище. С ревностью исполнил святой повеление Божие. Услышав, что идолопоклонники хотят умертвить его, святитель пришел на место народных собраний и открыто обличил заблуждения язычников. Язычники пытались схватить святителя. В это время в толпе закричали три бесноватых юноши. Народ пришел в замешательство, святитель же молитвой изгнал из них бесов. Видя юношей здоровыми, иерапольцы попросили святителя Аверкия научить их христианской вере, а потом приняли святое Крещение. После этого святитель отправился по соседним городам и селам, исцеляя больных и благовествуя о Царствии Божием. С проповедью он обошел Сирию, Киликию, Месопотамию, посетил Рим и везде обращал ко Христу множество людей. Святитель Аверкий за свои великие труды назван равноапостольным. Много лет он ограждал Церковь от еретиков, утверждал христиан в вере, наставлял заблудших на истинный путь, исцелял больных и рапространял славу Христову.

Тропарь равноапостольного Аверкия, епископа Иерапольского, чудотворца глас 4

Истины проповедник и чудотворец дивен показался еси,/ сирот отец и нищих заступник,/ бодрый пастырь словеснаго стада, бесом страшен,/ всех убо от тех нападений заступай, вопиющих ти:/ Аверкие отче наш,/ моли Христа Бога,/ да спасет души наша.

Кондак равноапостольного Аверкия, епископа Иерапольско глас 8

Яко священника превелиикаго и апостолов совсельника,/ Церковь почитает тя, вся верных, Аверкие:/ юже твоими молитвами соблюдай, блаженне,/ непобедиму и необуреваему от всякия ереси, и нескверну,/ яко приснопамятный.

Тропарь семи отроков Ефесских глас 4

Велия веры чудесе,/ в пещере, яко в чертозе царском,/ святии седмь отроцы пребыша,/ и умроша без тли,/ и по мнозех временех восташа, яко от сна,/ во уверение воскресения всех человеков.// Тех молитвами, Христе Боже, помилуй нас.

Кондак семи отроков Ефесских глас 4

Мира сущая тленная презревше/ и нетленныя дары приемше,/ умерше, кроме тления пребыша./ Темже востают по многих летех,/ все погребше лютых неверие,/ яже во хвалении днесь, вернии, восхваляюще,// Христа воспоим.

Молитва

О, пречуднии святии седмочисленнии отроцы, Ефеса града похвало и всея вселенныя упование! Воззрите с высоты небесныя славы на нас, любовию память вашу чтущих, наипаче же на младенцы христианския, вашему заступлению от родителей своих препорученныя: низведите на ня благословение Христа Бога, рекшаго: оставите детей приходить ко Мне: болящия убо в них исцелите, скорбящия утешите; сердца их в чистоте соблюдите, кротостию исполните я, и в земли сердец их зерно исповедания Божия насадите и укрепите, во еже от силы в силу им возрастити; и всех нас, святей иконе вашей предстоящих, мощи же ваша с верою лобызающих и тепле вам молящихся, сподобите Царствие Небесное улучити и немолчными гласы радования тамо прославляти великолепое имя Пресвятыя Троицы, Отца и Сына и Святаго Духа во веки веков. Аминь.

Тропарь Божией Матери пред иконой Ее Казанской глас 4

Заступнице усердная,/ Мати Господа Вышняго,/ за всех молиши Сына Твоего, Христа Бога нашего,/ и всем твориши спастися,/ в державный Твой покров прибегающим./ Всех нас заступи, о Госпоже, Царице и Владычице,/ иже в напастех, и скорбех, и в болезнех обремененных грехи многими,/ предстоящих и молящихся Тебе умиленною душею/ и сокрушенным сердцем/ пред пречистым Твоим образом со слезами/ и невозвратно надежду имущих на Тя,/ избавления всех зол,/ всем полезная даруй/ и вся спаси, Богородице Дево:// Ты бо еси Божественный покров рабом Твоим.

Кондак Божией Матери пред иконой Ее Казанской глас 8

Притецем, людие, к тихому сему и доброму пристанищу,/ скорой Помощнице, готовому и теплому спасению, покрову Девы,/ ускорим на молитву и потщимся на покаяние:/ источает бо нам неоскудныя милости Пречистая Богородица,/ предваряет на помощь и избавляет от великих бед и зол// благонравныя и богобоящияся рабы Своя.

Молитва Божией Матери пред иконой Ее Казанской

О Пресвятая Госпоже Владычице Богородице! Со страхом, верою и любовию пред честною иконою Твоею припадающе, молим Тя: не отврати лица Твоего от прибегающих к Тебе, умоли, Милосердая Мати, Сына Твоего и Бога нашего, Господа Иисуса Христа, да сохранит мирну страну нашу, Церковь же Свою святую непоколебиму да соблюдет и от неверия, ересей и раскола да избавит. Не имамы бо иныя помощи, не имамы иныя надежды, разве Тебе, Пречистая Дево: Ты еси всесильная христиан Помощница и Заступница. Избави же и всех с верою Тебе молящихся от падений греховных, от навета злых человек, от всяких искушений, скорбей, болезней, бед и от внезапныя смерти; даруй нам дух сокрушения, смирения сердца, чистоту помышлений, исправления греховныя жизни и оставление прегрешений, да вси, благодарне воспевающе величия и милости Твоя, являемыя над нами зде на земли, сподобимся и Небеснаго Царствия и тамо со всеми святыми прославим пречестное и великолепое имя Отца и Сына и Святаго Духа во веки веков. Аминь.

Величание

Величаем Тя,/ Пресвятая Дево,/ и чтим образ Твой святый,/ от негоже истекает благодатная помощь// всем, с верою притекающим к нему.

          Молитва Андрониковской Богородице

О, Пресвятая Госпоже Владычице Богородице! Вышши еси всех Ангел и Архангел, и всея твари Честнейши: Помощница еси обидимых, ненадеющихся Надеяние, убогих Заступница, печальных Утешение, алчущих Кормительница, нагих Одеяние, больных Исцеление, грешных Спасение, христиан всех Поможение и Заступление. О, Всемилостивая Госпоже, Дево Богородице Владычице! Милостию Твоею спаси и помилуй благочестивейшаго, самодержавнейшаго, Великаго Государя нашего, Императора Николая Александровича Всея России, супругу его, благочестивейшую Государыню Императрицу Александру Феодоровну; матерь его, благочестивейшую Государыню Императрицу Марию Феодоровну; наследника его, благовернаго Государя Цесаревича и Великаго Князя Алексия Николаевича, и весь царствующий дом. Спаси, Госпоже, и помилуй раб Твоих, святейший правительствующий Синод, и преосвященныя митрополиты, архиепископы и епископы, и весь священнический и иноческий чин, и благоверный правительствующий синклит, и военачальники, градоначальники, и христолюбивое воинство, и доброхоты, и вся православныя христианы ризою Твоею честною защити; и умоли, Госпоже, из Тебе без семени воплотившагося Христа Бога нашего, да препояшет нас силою Своею свыше на невидимыя и видимыя враги наша. О, Всемилостивая, Госпоже Владычице Богородице! Воздвигни нас из глубины греховныя, и избави нас от глада, губительства, от труса и потопа, от огня и меча, от нахождения иноплеменных и междоусобной брани, и от внезапныя смерти, и от нападения вражия, и от всякаго зла. Подаждь, Госпоже, мир и здравие рабом Твоим, всем православным христианом, и просвети им ум и очи сердечныя, еже ко спасению, и сподоби ны, грешныя рабы Твоя, Царствия Сына Твоего, Христа Бога нашего: яко Держава Его благословена и препрославлена, со Безначальным Его Отцем, и с Пресвятым и Благим и Животворящим Его Духом, ныне и присно и во веки веков. Аминь.

Тропарь Якобштадтской иконе Божией Матери глас 5

Во бури Пристанище, / и Посещение больным, / и странным Покров, и Заступление, / на путь покаяния, Дево, настави нас, / и от внезапныя смерти избави нас. / Смиренно припадая к Тебе молимся: // помози нам, Едина Чистая, на Тя бо надеемся.