20 октября день памяти Мучеников Сергия и Вакха, Мученицы Пелагии Тарсийской, Преподобного Сергия Обнорского, Нуромского, Вологодского, Преподобного Мартиниана Белозерского, Псково-Печерская икона Божией Матери "Умиление"

Тропарь мучеников Сергия и Вакха глас 5

Удобрение Христовых страстотерпец/ и очи Христовы Церкве,/ очи просветите душ наших,/ Сергие многострадальне и Вакше преславне:/ молитеся ко Господу,/ яко да убежим тьмы греховныя/ и Света явимся общницы невечерняго// молитвами вашими, святии.

Кондак мучеников Сергия и Вакха глас 2

Разум на враги мужески вооруживше,/ всю тех лесть разрушисте,/ и победу свыше приимше, мученицы всехвальнии,/ единомысленно вопиюще:// добро и красно еже быти с Богом.

Тропарь мученицы Пелагии глас 4

Агница Твоя, Иисусе, Пелагия/ зовет велиим гласом:/ Тебе, Женише мой, люблю,/ и, Тебе ищущи, страдальчествую,/ и сраспинаюся, и спогребаюся Крещению Твоему,/ и стражду Тебе ради,/ яко да царствую в Тебе, и умираю за Тя,/ да и живу с Тобою,/ но яко жертву непорочную приими мя, с любовию пожершуюся Тебе./ Той молитвами,/ яко Милостив, спаси души наша.

Кондак мученицы Пелагии глас 3

Временная презревши/ и Небесных благ причастница бывши,/ венец страдания ради приимши,/ Пелагие всечестная,/ яко дар принесла еси кровныя потоки Владыце Христу./ Моли от бед избавити нас,/ твою память почитающих.

Тропарь преподобного Сергия Нуромского (Вологодского) глас 8

Желанием духовным разгарашеся, пребогате,/ слез твоих течением душу свою напоил еси/ и еже из глубины воздыханьми уязвляше сердце свое,/ и бодренными молитвами, и всенощным предстоянием Владыце Христу/ многодобродетелен плод принесе сам себе./ И сего ради яко Божий угодник светло миру показася,/ сияя чудесы, Сергие отче наш,/ теплый молитвенниче к Богу, всегда о нас Того моли,/ да спасет души наша.

  Кондак преподобного Сергия Нуромского (Вологодского) глас 8

Яко звезда пресветлая, от Святыя Горы провозшедши,/ доброты чудес твоих весь просветил мир,/ Христов бо крест взем, последова Ему,/ в пустынном озлоблении, в молитвах же и пощениих,/ во бдениих же и злостраданиих изнурив плоть свою,/ тем и Христос даром чудес одари тебе,/ Емуже о нас моляся, посещай чад своих, да зовем ти:/ радуйся, Сергие отче наш, пустынный жителю.

Молитва преподобному Сергию Нуромскому, Вологодскому чудотворцу

О великий чудотворче, преподобне отче наш Сергие! Услыши нас грешных молящихся тебе и имя твое святое на помощь призывающих, не презри нас чтущих тя: моли о нас грешных Содетеля нашего Господа Бога, тебе бо дадеся благодать молитися за нас. Не мним бо тя мертва суща: аще бо телом и преставился еси от нас, и рака твоя пред очима нашима видима есть, но святая твоя душа со ангельскими лики предстоит у Престола Вседержителева. О пастырю наш, преподобне отче сергие! Потщися сохранити нас от пагубныя смерти и от бесовскаго искушения, умом от малодушия помраченных. Не остави нас, светильниче Христов, плененных быти, но помози нам молитвами твоими от вечныя муки избавитися и наследники Царствия Небеснаго быти со всеми святыми от века угодившими Господу Богу нашему Иисусу Христу, Емуже подобает честь, поклонение, слава и держава, со Безначальным Его Отцем и Пресвятым и Благим и Животворящим Его Духом, ныне и присно и во веки веков. Аминь.

Тропарь преподобного Мартиниана Белоезерского глас 2

Богу от юности, отче, избравшу и возлюбившу тя/ и провидящу твое доброе произволение,/ наставляет тя приити к преподобному Своему угоднику -/ Кириллу всеблаженному,/ от негоже наставлен бысть на путь спасения,/ страхом Божиим, и чистотою душевною, и благоговением,/ и непрестанными к Богу молитвами/ во мнозе подвизе жизнь свою препроводил еси/ и заповеди Божия непорочно соблюл еси,/ пастырь и наставник иноком предивен был еси,/ и ныне Престолу Христову со дерзновением предстоиши на Небесех,/ со Ангелы светлоликовствуя,/ отче преподобне, Мартиниане всеблаженне,/ не престай молися Христу Богу/ спасти и помиловати души наша.

Кондак преподобного Мартиниана Белоезерского глас 8

Благоизволив, преподобне,/ от юнаго возраста работати Господеви день и нощь,/ в страсе Божий и благоговении чистоту душевную соблюл еси,/ в молитвах же и бдениих ум твой предочистил еси,/ в подвизех же, злостраданиих тело твое изнурив,/ вся добродетели духовный исправил еси/ и образ хотящим по тебе спастися явился еси./ Темже ныне, присно зря на Небесех Пресвятую Троицу,/ молися, всеблаженне, даровати душам нашим спасение,/ и житию нашему исправление,/ да вси верою вопием ти:/ радуйся, преподобне Мартиниане, отче наш.

Молитва

О Богоблаженнии и преподобнии отцы наши, Ферапонте и Мартиниане! Молимся вам и от сердца с любовию вопием, да нас, непотребных, вразумите и просветите и своими молитвами укрепите некая похвальная словеса принести в память вашего преставления не бо в мудрости слова дерзаю глаголати, но со многою верою и любовию чадолюбивым отцам сия приношу. Вы убо, преподобнии, сами наши недостатки наполните, без вашея бо помощи, блаженнии, ничтоже можем благо сотворити, но, пребывающе в дому Пречистыя Богородицы вашея ограды, надеемся вами, благими предстателями, свободни пред Богом явитися, необладанными быти от враг видимых и невидимых. О пастырие добрии, истиннии строители винограда Христова, отцем славо, преподобным единонравнии, праведным единовсельницы, иноком наставницы и общему житию совершители изряднии. Ныне на Небесех Святей Троице предстоите со всеми угодившими Ей. Ныне убо, о Богоблаженнии и преподобнии отцы, помяните стадо свое, еже мудре собрасте, и соблюдите Богодарованную вашу паству и, яко чадолюбивии отцы, посещайте и не презрите нас, чтущих верою и любовию пречестную и многорадостную вашу память. Сохраняйте нас и соблюдайте от всех видимых и невидимых враг, приидйте посреде нас невидимо и всех нас моления, Богови возсылаемая, пришлите и принесите, сия ходатайственне всех Творцу и Избавителю, Иже в Троице Святей покланяемому истинному Богу нашему, яко да согрешением нашим оставление получим в День Судный благодатию и человеколюбием Господа нашего Иисуса Христа, с Нимже Отцу слава и Святому Духу вкупе, Трисиянному Божеству, ныне, и присно, и во веки веков. Аминь.

Тропарь Пресвятой Богородице в честь иконы Ее «Умиление» Псково-Печерскаяглас 4

К Богородице с умилением припадем вси, грехми обремененнии, чудотворную Ея икону Умиления облобызающе и вопиюще со слезами: Владычице, приими моление недостойных раб Твоих и подаждь нам, просящим велию Твою милость.

Кондак Пресвятой Богородице в честь иконы Ее «Умиление» Псково-Печерская глас 6

Не имамы иныя помощи, не имамы иныя надежды, разве Тебе, Пречистая Дево. Ты нам помози, на Тебе надеемся и Тобою хвалимся, Твои бо есмы раби, да не постыдимся.

Молитва

О, Преблагословенная Дево Богородице Владычице! Мати всех страждущих и болезнующих сердцем! Страны нашея и града Защитнице! Обители Псково-Печерския красото и славо! Призри на нас смиренных, обремененных грехи многими, отягченных скорбьми и печалями и с сокрушением и слезами взирающих на пречистый лик Твой, в чудотворней иконе явленный. Сохрани от всякаго зла святую обитель сию, юже преподобный Корнилий со старцы Марком и Ионою Тебе вручи, и всех в вере и надежде подвизающихся в ней. Спаси и град сей, и вся люди, правоверно живущия и к Тебе прибегающия, от нашествия иноплеменных, от всякаго страха и труса, от мора и глада, от злых человек и всяческия скорби. Приникни к нам милосердием Твоим, яко ликом Твоим Божественным любезно приникла еси к ланите Богомладенца. Согрей нас дыханием Твоея любве и никогдаже отступай от нас, ни в сей жизни, ни в будущей, да, чающе Твою всесильную Материнскую помощь, сподобимся безбедно дойти вечныя жизни и прославляти Небеснаго Отца и Сына и Святаго Духа, в Троице славимаго Бога, во веки веков. Аминь.