15 декабря день памяти Пророка Аввакума, Преподобного Афанасия Печерского, затворника, Святого Стефана Уроша, царя Сербии, Мученицы Миропии Хиосской , Иконы Божией Матери, именуемой «Герондисса»

Тропарь преподобного Афанасия, затворника Печерского, в Ближних пещерах    глас 3

Блаженство плачущих получити желая,/ день и нощь непрестанно плакал еси,/ имея во уме час Судный,/ тем по кончине твоей обрел еси утешение на Небеси,/ преподобне Афанасие./ Подаждь и нам плакатися зде грехов наших выну,/ яко да плача безконечнаго избывше,/ тамо приимем вечное утешение.

Кондак преподобного Афанасия, затворника Печерского, в Ближних пещерах   глас 5

Яко безсмертия тезоименит, по умертвии своем востал еси жив;/ показуя же, яко зело люта есть смерть, плакался еси горько./ Ныне, обретши некончаемую радость,/ молися о нас, яко да плача вечнаго избудем.

Тропарь преподобного Афанасия, затворника Печерского, в Дальних пещерах   глас 7

По имени своему за труды велия/ и всегдашнее зде умерщвление плоти в затворе/ безсмертную ныне на Небеси/ жизнь наследовавый,/ молим тя прилежно:/ молися о нас,/ яко да и мы тояжде сподобимся получити.

Кондак преподобного Афанасия, затворника Печерского, в Дальних пещерах   глас 5

Яко безсмертия тезоименит, по умертвии своем востал еси жив;/ показуя же, яко зело люта есть смерть, плакался еси горько./ Ныне, обретши некончаемую радость,/ молися о нас, яко да плача вечнаго избудем.

Тропарь святого Стефана Уроша V, царя Сербского   глас 3

Юношески процвел еси/ во отечествии твоем, добротою украшен,/ и неправедную и безвременную смерть подъял еси,/ Уроше всечестне;/ царскаго корене плод сладок,/ аще и не во время созрев,/ в Господню житницу вселился еси/ и жалость велию сродству твоему оставил еси./ Молися о нас, творящих святую память твою.

Кондак святого Стефана Уроша V   глас 6

Отрасли благородныя цвет прекрасный явился еси, Уроше всечестне,/ завистию бо убиен был еси от твоих присных,/ Божиим же Духом просвещен,/ святороднаго племене свят был еси/ и, мученическим венцем увязся,/ в чертозе Небеснем водворяешися./ Молися о нас, святе, творящих любовию память твою.

Тропарь мученицы Миропии   глас 1

Добромученице Миропие и Христа невесто нетленная,/ ныне Емуже предстоиши, прекрасная,/ раны носящи плоти,/ яко камни светлы и светообразны,/и в кровавую порфиру, яко царица, облеченная, преславная,/ умоли Его за ны,/; яже с любовию восхваляющия/ хвалы победными; и песньми твою Божественную страсть.

Кондак мученицы Миропии   глас 3

По имени, о страстотерпице Миропие,/ миро источаеши благодати чудес/ и пасеши всех, подобающих и взыскающих/ и верою и добродетелию прибегающих к раке твоей пречестней,/ яже держит прах твой.

Тропарь Пресвятой Богородице пред иконой Ея «Геронтисса»   глас 4

Я́ко пресве́тлая звезда́,/ проси́л Боже́ственными чудесы́/ святы́й о́браз Тво́й, Изба́вительнице,/ луча́ми благода́ти и милосе́рдия Твоего́/ озари́в в но́щи скорбе́й су́щих./ Пода́ждь у́бо и на́м, Всеблага́я Де́во,/ избавле́ние от бе́д,/ исцеле́ние неду́гов душе́вных и теле́сных,/ спасе́ние и ве́лию ми́лость.

Кондак Пресвятой Богородице пред иконой Ея «Геронтисса»    глас 8

Ко ико́не Твое́й, Пресвята́я Госпоже́, бе́дствовавшии с ве́рою прите́кше, заступле́нием Твои́м изба́вишася от злы́х, но я́ко Ма́терь Христа́ Бо́га и на́с свободи́ от лю́тых обстоя́ний, вре́менных и ве́чных, да зове́м Ти́: ра́дуйся Изба́вительнице на́ша от все́х бе́д.

Молитва. «О Пресвятая Госпоже, Владычице моя Богородице, Небесная Царице! Спаси и помилуй мя, грешного раба Твоего, от напрасныя клеветы, от всякия беды и напасти и внезапный смерти. Помилуй мя в дневных часех и утренних и вечерних, и во всякое время сохрани мя: стояща, седяща соблюди, и на всяком пути ходяща, и в ночных часех спяща снабди, покрый и заступй. Защити мя, Владычице Богородице, от всех враг моих видимых и невидимых и от всякого злаго обстояния. На всяком месте и на всякое время буди ми, Мати Преблагая, стена необоримая и заступление крепкое. 

О Пресвятая Госпоже, Владычице Дево Богородице! Приимй недостойную молитву мою, и сохрани мя от внезапныя смерти, и даруй ми прежде конца покаяние.

Пресвятая Богородице, спаси нас! Ты мне Хранительница жизни всея явися, Пречистая: Ты мене избави от бесов в час смерти: Ты и по смерти мене упокой. Под Твою милость прибегаем, Богородице Дево: молений наших не презри в скорбех, но и от бед избави нас, едина Чистая и Благословенная. Пресвятая Богородице, спаси нас. Аминь».