13 октября день памяти Сщмч. Григория еп., просветителя Великой Армении, Преподобного Григория, Пельшемского, Вологодского чудотворца, Святителя Михаила, первого митр. Киевского

Тропарь священномученика Григория глас 4

И нравом причастник,/ и престолом наместник апостолом быв,/ деяние обрел еси, богодухновенне,/ в видения восход;/ сего ради слово истины исправляя,/ и веры ради пострадал еси даже до крове,/ священномучениче Григорие,/ моли Христа Бога// спастися душам нашим.

Благославнаго и священноначальника вси,/ яко страдальца истины,/ днесь верни в песнех и песнопениих восхвалим,/ бодраго пастыря и учителя Григория,/ всемирнаго светильника и поборника,// Христу бо молится, еже спастися нам.

Тропарь преподобного Григория Пельшемского, Вологодского чудотворца глас 8

Любовию Христовою, богомудре, просветився, / добродетельми облистал еси: / и всякое наслаждение плотское возненавидев, / и в пустыню вселився, в нейже вельми подвизался еси в жизни сей временней / в пениих и во бдениих, и в пощениих. / Сего ради и Христос даром чудес обогати тя: / но поминай нас чтущих пресветлую память твою, преподобне отче Григорие, / и моли Христа Бога, спастися душам нашим.

Кондак преподобного Григория Пельшемского, Вологодского чудотворца глас 8

Христовою любовию уязвився преподобне,/ и Тому невозвратным желанием последовал еси,/ всякое наслаждение плотское возненавидев,/и в пустыню вселився, в ней вельми подвизался еси:/ тем и Христос даром чудес обогати тя. Поминай нас чтущих пресветлую память твою, да зовем ти:/ радуйся, преподобне Григорие, отче наш.

Молитва преподобному Григорию Пельшемскому, Вологодскому

О священная главо, преподобне отче, преблаженне авво Григорие! Не забуди чад твоих, ихже богоугодными труды и молитвенными подвиги духовно породил еси; поминай нас во святых твоих благоприятных молитвах и назидай предстательством твоим стадо твое, еже сам упасл еси; моли за ны, отче священный, дети твоя духовныя, яко имеяй дерзновение к Небесному Царю; не премолчи за ны ко Христу, и не презри нас, верою и любовию чтущих тя. Поминай недостойных нас пред Престолом Вседержителя, тебе бо дадеся благодать молитися за ны. Аще бо телом преставился еси от нас, но и по смерти жив во Христе пребываеши, не отступи от нас духом, сохраняй нас от стрел вражиих от прелести бесовския и козней диавольских, пастырю наш добрый. Се бо, ракою мощей твоих пребывая с нами, святою твоею душею с Небесными Силами у Престола Вседержителева предстоиши и тамо достойно славиши Господа. Темже, припадающе со умилением, молимся тебе о спасении душ наших; испроси нам время на покаяние и невозбранно прейти от земли на Небо чрез мытарства горьких бесов, да твоим предстательством от вечныя муки избавльшеся, Небесное Царствие наследовати сподобимся со всеми праведными, от века угодившими Христу Господу нашему; Емуже подобает всякая слава, честь и поклонение, ныне и в бесконечныя веки веков. Аминь.

Тропарь святителя Михаила, митрополита Киевского глас 4

Днесь пророчествие во апостолех Первозваннаго исполнися:/ се бо на сих горах возсия благодать и вера умножися./ И иже неверием обветшавший/ Божественною купелию отродишася/ и быша людие обновления,/ царское священие, язык свят, Христово стадо,/ емуже ты первый пастырь явился еси,/ яко первее Крещением послуживый./ И ныне, предстоя Владыце Христу Богу,/ моли всем сыном русским спастися:/ имаши бо дерзновение яко иерарх Божий и священнослужитель.

Кондак святителя Михаила, митрополита Киевского           глас 2

Моисей вторый России явился еси, отче,/ пренесый мысленный виноград от египетскаго идолослужения/ в землю пророчествием предувидену./ Будет, рече, утверждение веры на земли,/ и на версех гор Киевских превознесется паче Ливана/ плод питающ мира всего./ От негоже вкусивше,/ ублажаем тя, Михаиле, Божий иерарше.

Молитва Михаилу, первому митрополиту Киевскому

Святый великий и преславный архипастырю и отче нaш Михаиле, страны Российския первопрестольниче и просветителю, всех же племен христианских благонадежный пред Богом ходатаю, тебе припадающе молимся: помози нам быти твоея к Богу любве подражателем, ею же в земнем животе твоем преисполнен был еси. Просвети умы и сердца наша светом Божественнаго учения. Научи нас тебе последовати верно и заповеди Господни усердно творити, да явимся чада твоя не именем токмо, но и всем житием, тако познаемся. Молися, равноапостольне иерарше, о Церкви Российстей, о граде твоем и обители, в ней же нетленно мощи твоя святыя почивают, и о всем Отечестве нашем, призри милостивно на вся верныя твоя чтители, помощи твоея ищущия: буди всем в болезнех целитель, в скорбех и печалех утешитель, в бедах и нуждах помощник, в час же смертный заступник и покровитель, да твоею помощию сподобимся и мы грешнии спасение получити и Царствие Христово наследовати. Ей, святителю Христов, аще восхощеши можеши помощи нам, да на помощь твою уповаюше, прославим Дивнаго во святых Своих Бога Отца и Сына и Святаго Духа, ныне и присно и во веки веков. Аминь.