11 октября день памяти Преподобных Кирилла и Мария Радонежских, родителей преподобного Сергия Радонежского, Собора преподобных отцов Киево-Печерских

Собор преподобных отцов Киево-Печерских

Тропарь Собора преподобных отцев Киево-Печерских глас 4

Столп огнезрачный и светоносное солнце, возсиявшее на горе Печерской,/ великаго Антония со всем собором Богоносных отец приводим Тебе, Христе, в молитву,/ ихже ради молим, подаждь обители нашей благодать и душам нашим велию милость.

 Ин тропарь Собора преподобных отцев Киево-Печерских   глас 2

Егда снидосте во гробы и самех себе заключисте,/ тогда страсти умертвивше плотския,/ спогребостеся Христу, Богоноснии,/ и диавольския в подземных разрушисте ограды./ Сего ради Ангели венцы с Небес вам подают.

Кондак Собора преподобных отцев Киево-Печерских глас 2

Лик постнический собрася умне,/ мысленныма зряще очима,/ приидите, людие, хвалами почтите,/ покланяющеся мощем их,/ любовныя принесите дары,/ тии бо суть к Богу ходатае и молитвенницы о душах наших.

Ин кондак Собора преподобных отцев Киево-Печерских  глас 8

Отцы всечестнии, личе Богокрасный,/ чудес многих источницы, миро источающии,/ сокровища краснобогатная Господня, земли сокровенная,/ не престайте, молим вы, о нас молитися ко Господу,/ да зовем вам:/ радуйтеся всему миру светильницы.

Величание Собору преподобных отцев Киево-Печерских

Велича́ем вас,/ преподо́бнии отцы́ на́ши Пече́рстии,/ и чтим святу́ю па́мять ва́шу,/ вы бо мо́лите о нас// Христа́, Бо́га на́шего.

Молитва всем преподобным Киево-Печерским

Преподобнии и богоноснии отцы наши Антоние и Феодосие, и вси преподобнии Печерстии, светила земная пресветлая, от темных мест пещерных в земли Русской славно просиявшии, и сию многими светозарными ангелонравнаго вашего жития звездами онебесившии, всю же Вселенную высоких добродетелей светлостьми и чудес божественных блистаньми удивившии, и ныне смертным западом плотски на время во гроб зашедше, душами со Христом Солнцем Правды, суще праведницы просвещаетеся, яко солнце во Царствии Небеснем: идеже молитвенная ваша к Богу Свету лучи о Отечестве своем простирающе, не забудите и нас, всегдашния своя молитвенники, в нощи страстей и скорбей пребывающия, свыше благодатными призирати осиянии; яко да во свете добродетельнаго вашего жития право ходяще, сподобимся зрети свет неприкосновенныя славы Божия, хваляще Его купно с вами в нескончаемыя веки. Аминь.